A CIG-Ensino presentou esta semana a súa táboa reivindicativa á Consellaría de Educación, coa esixencia de abrir unha negociación no prazo dun mes. Entre as demandas inclúense a baixada inmediata de ratios en todas as etapas, a recuperación do horario lectivo previo aos recortes, un incremento de profesorado e especialistas para atender a diversidade e reforzos, así como a supresión de burocracia innecesaria e a dignificación da carreira docente, tamén no plano retributivo.
Nunha comparecencia celebrada en Compostela, a secretaria nacional do sindicato, Laura Arroxo, advertiu de que o curso arrinca “sen ningunha medida positiva” que reverta o deterioro das condicións laborais do profesorado nin a perda de calidade no ensino público. “Temos un profesorado literalmente queimado, con ratios de ata 200 estudantes, unha diversidade crecente nas aulas e unha burocracia que asfixia”, declarou, incidindo tamén en que Galicia conta “co peor horario lectivo de secundaria, FP e ensinanzas de réxime especial do Estado”.
A campaña ‘Rectificar, Recuperar, Recoñecer’, xa iniciada en xuño, incluirá dúas primeiras mobilizacións no mes de setembro: unha manifestación nacional en Santiago o sábado 13, á que están chamadas familias, alumnado e colectivos sociais, e unha xornada de folga xeral o xoves 25, que culminará cunha protesta diante da Consellaría de Educación.
Arroxo denunciou que a Xunta “falsea datos” sobre persoal docente e que a única etapa na que houbo un incremento nos últimos anos foi a FP grazas a fondos europeos, mentres que en infantil, primaria e secundaria se pecharon unidades e se amortizaron xubilacións. Segundo explicou, os fondos europeos para inclusión educativa están a ser usados “para cubrir necesidades estruturais” e non para reforzar a atención á diversidade, o que cualificou de “fraude”.
O sindicato tamén puxo o foco no aumento das prazas con materias afíns, que obrigarán a profesorado de diferentes especialidades a impartir docencia fóra da súa formación específica. Ademais, criticou que unha parte relevante das prazas convocadas nas oposicións deste verán quedasen desertas, o que, ao seu xuízo, agrava a inestabilidade dos claustros.
Outros puntos sinalados pola CIG-Ensino foron a ausencia de medidas retributivas efectivas, a escaseza de especialistas en pedagoxía terapéutica e audición e linguaxe, a falta dun Plan de Igualdade, a eliminación de recursos como a Rede de Acompañamento e Orientación Persoal e Familiar e as limitacións á autonomía pedagóxica dos centros.
O sindicato percorrerá máis de mil centros educativos galegos nas próximas semanas para celebrar asembleas co profesorado e recoller apoios ás mobilizacións. “A forza da mobilización reside na unidade do colectivo docente”, concluíu Arroxo, quen instou á comunidade educativa e á cidadanía a implicarse no conflito, lembrando que “do que pase nas aulas depende en gran medida o que pase na sociedade”.
