A plataforma ‘Por un Monte Galego con Futuro’ anunciou a convocatoria dunha gran manifestación en Santiago o próximo 14 de setembro, cunha marcha que sairá ás 12:00 da Alameda compostelá. O obxectivo é reclamar á Xunta a posta en marcha de medidas que impidan unha nova vaga de incendios e un plan de choque con axudas inmediatas para os territorios e veciños afectados polos lumes.
A mobilización chega tras as máis de 30 concentracións simultáneas celebradas o pasado 21 de agosto en diferentes localidades galegas, que reuniron a milleiros de persoas. A plataforma considera que é o momento de dar un paso máis e levar a protesta á capital de Galicia para visibilizar a magnitude da demanda social.
‘Por un Monte Galego con Futuro’ está integrada por medio centenar de asociacións, colectivos e organizacións. Nacida en 2018, a súa traxectoria estivo marcada pola defensa do bosque autóctono, a presentación de iniciativas lexislativas populares para a racionalización da xestión forestal e a oposición á política forestal do Goberno galego.
Segundo explican desde a organización, a situación xerada polos incendios deste verán evidencia a necesidade de adoptar medidas estruturais e urxentes que garantan a protección do monte e a seguridade das poboacións rurais.
