Unha manifestación feminista convocada pola Marcha Mundial das Mulleres denunciou esta tarde en Santiago o asasinato machista da veciña de Moraña, cuxo corpo foi atopado recentemente, xunto co do seu maltratador, en Campo Lameiro. A mobilización deu comezo na Praza 8 de Marzo, pero axiña se desprazou á rúa Virxe da Cerca, provocando importantes retencións de coches e autobuses nesta rúa da cidade.
A protesta prodúcese pouco despois de que se confirmase por análise de ADN que os corpos atopados o pasado domingo corresponden á parella desaparecida días antes en Moraña, un caso que está a ser investigado como crime machista. Segundo as pescudas policiais, o home tería acabado coa vida da muller antes de suicidarse.
As manifestantes esixiron “responsabilidades” a quen “recortan en prevención e recursos contra a violencia de xénero”, a quen “non invisten na investigación da violencia machista”, a quen “desmantela servizos públicos que salvan vidas”, a quen desde o poder “minimiza” a violencia de xénero e a quen “cala ante as violencias” que sofren a diario as mulleres.
Igualmente, o colectivo feminista As Moiras de Moraña (que criticou ao goberno local deste municipio por decretar tres días de loito, tanto pola muller falecida como pola súa parella e presunto agresor, colocándoos “ao mesmo nivel”) tamén convocou unha concentración para última hora da tarde deste xoves.
