A Asociación de Loita Contra as Enfermidades do Ril (Alcer) continúa un ano máis coa súa campaña ‘7 Vidas’, que busca sensibilizar á cidadanía sobre a doazón e o transplante de órganos, así como promover hábitos de saúde renal. A campaña, que inclúe varias accións informativas e educativas, estará presente na cidade de Santiago durante as próximas semanas con diferentes mesas informativas e actividades en lugares clave.
O próximo domingo 28 de maio, durante o partido entre a SD Compostela e o Real Valladolid Promesas, Alcer instalará unha mesa informativa no estadio Verónica Boquete de San Lázaro, onde repartirá máis de mil dípticos informativos entre os asistentes ao encontro deportivo, que dará comezo ás 12:00 horas. Esta acción forma parte da estratexia de sensibilización da asociación, que tamén terá outro dos seus momentos centrais o 4 de xuño, coincidindo co Día da Doazón de Órganos. Nesa data, Alcer instalará unha mesa informativa na Praza do Toural, onde tamén se distribuirán máis de mil dípticos. A campaña tamén se difundirá a través das redes sociais, ampliando o alcance de mensaxes clave sobre a importancia da doazón.
A concelleira de Dereitos e Servizos Sociais, María Rozas, destacou que o obxectivo da campaña é fomentar entre a veciñanza de Santiago a doazón de órganos como “un dos actos máis solidarios e altruístas que poden exercer as persoas”. Pola súa banda, o coordinador de Alcer, Alfredo Saborido, agradeceu o apoio do Concello de Santiago e das entidades que colaboran co programa ao longo do ano. Saborido destacou que “cada un de nós podemos salvar sete proxectos vitais doando os nosos órganos tras a nosa morte, e mesmo podemos ser doantes en vida de órganos como o ril”. A asociación tamén quere concienciar sobre as necesidades dos pacientes con enfermidade renal crónica, un problema que afecta a máis de 300 persoas na área sanitaria de Santiago, que precisan de tratamento de diálise para poder vivir.
As actividades de sensibilización que Alcer desenvolve tamén inclúen charlas en espazos educativos da cidade, co fin de fomentar entre a xuventude a importancia de adoptar hábitos saudables para coidar os riles e coñecer as implicacións da doazón. Segundo a concelleira Rozas, accións como estas son “fundamentais” para manter o liderado de Galicia en taxas de doantes de órganos, que no pasado ano acadaron a cifra histórica de 50,7 doantes por millón de habitantes, a maior desde que hai rexistros.
