Comisións Obreiras (CCOO), o Colexio Oficial de Traballo Social (COTS) e o Sindicato Labrego Galego-Comisións Labregas (SLG-CCLL), todas elas integrantes do Consello Galego de Benestar Social (CGBS), convocan unha concentración o luns 10 de febreiro ás 11:00 horas diante da sede da Xunta de Galicia en San Caetano, en Santiago de Compostela. O obxectivo da mobilización é reclamar melloras no sistema público de atención ás persoas dependentes e denunciar os problemas derivados das recentes modificacións lexislativas neste ámbito.

As organizacións convocantes aseguran que a Xunta modificou os procedementos de recoñecemento da dependencia sen informar debidamente ás profesionais dos concellos, encargadas da xestión destes trámites. Segundo denuncian, máis dun mes despois da publicación destes cambios, as traballadoras comunitarias seguen sen recibir información nin foron convocadas a unha reunión para abordar a situación.

CCOO, COTS e SLG tamén acusan á Consellaría de Política Social de evitar dar explicacións sobre os cambios na atención á dependencia, xa que a titular do departamento, Fabiola García, segue sen comparecer nun pleno urxente do CGBS, a pesar de que a súa presenza foi solicitada en novembro de 2024.

DATOS PREOCUPANTES E DENUNCIA DA PRIVATIZACIÓN

As entidades sindicais e sociais alertan de que a precariedade do sistema galego de atención á dependencia está provocando importantes atrasos na tramitación das axudas e servizos, ata o punto de que, segundo os seus datos, unha media de 30 persoas falecen cada mes en Galicia mentres agardan por unha valoración. Galicia, sinalan, é a comunidade co menor índice de solicitudes de dependencia do Estado, cunha taxa de só 18 peticións por cada 100 persoas dependentes, unha cifra que atribúen á falta de medios e ás dificultades burocráticas.

Ademais, critican que a Xunta tenta xustificar os atrasos nas tramitacións culpabilizando as traballadoras sociais, insinuando que a demora podería deberse a unha mala praxe, cando en realidade o persoal está sobrecargado pola falta de contratación de máis profesionais. Segundo afirman, hai equipos sen funcionar pola ausencia de traballadores.

Tamén denuncian a estratexia da Xunta de fomentar a privatización dos servizos, destacando que nos últimos meses houbo unha campaña de publirreportaxes en determinados medios ensalzando a xestión privada da atención á dependencia, o que consideran un intento de agochar as carencias do sistema público.

CHAMAMENTO Á MOBILIZACIÓN

Ante esta situación, as entidades convocantes fan un chamamento á cidadanía para que se sume á concentración deste luns en Santiago, co obxectivo de esixir melloras no sistema público de atención á dependencia e evitar a súa precarización e privatización.

“A atención ás persoas dependentes é unha cuestión de dignidade social. Sen coidados, non hai dignidade”, conclúen as organizacións.