Varios colectivos, asociacións e entidades de Santiago de Compostela recolleron máis de 1.500 firmas desde o pasado verán en apoio ao pobo palestino. Así, con motivo da celebración do Día Internacional da Paz, o 30 de xaneiro realizarán unha entrega simbólica destas firmas á corporación municipal da capital galega.
O Foro Galego de Inmigración considera que nestes momentos, co cesamento temporal da guerra, é necesario “facer un maior esforzo para garantir que o cesamento sexa definitivo“. Así mesmo, detallou que as firmas se rexistrarán de forma pública o vindeiro martes 11 de febreiro na Delegación do Goberno para o seu traslado ao Executivo central.
O manifesto reclamaba o alto ao fogo inmediato; a apertura de corredores humanitarios; a solución pacífica e negociada con base no dereito internacional, incluíndo o retorno das persoas palestinas; a posta en marcha dun proceso de diálogo que garanta “o fin da ocupación e o apartheid contra o pobo palestino; e o fin do comercio de armas con Israel.
