A ANPA Fontela do CEIP das Fontiñas de Santiago de Compostela difundiu un vídeo nas súas redes sociais para denunciar os recortes no profesorado especialista e no persoal coidador asignado ao alumnado con necesidades educativas especiais. Segundo o colectivo, a redución de profesionais neste ámbito agrava a situación educativa do centro, afectando tanto ao alumnado con necesidades específicas como ao conxunto das clases.
O vídeo, dispoñible nas redes da ANPA, inclúe fragmentos das declaracións do presidente da Xunta, Alfonso Rueda, e do conselleiro de Educación, Román Rodríguez, contrastadas con novas e imaxes de mobilizacións e protestas levadas a cabo polas familias e o profesorado.
A ANPA sinala que, neste curso, o persoal especialista reduciuse de 6 a 4 profesionais, eliminando unha profesora de Pedagoxía Terapéutica e outra de Audición e Linguaxe, dúas figuras que consideran esenciais para a atención adecuada do alumnado con necesidades especiais. ‘Estes recortes afectan a unha atención temperá imprescindible para o desenvolvemento destes nenos e nenas’, expresaron desde a ANPA, indicando que a redución de recursos provoca que os titores deban desatender ao conxunto da clase para cubrir necesidades específicas.
O colectivo, apoiado polo claustro, esixe á Xunta de Galicia a reposición do persoal eliminado, reclamando polo menos os mesmos recursos do curso pasado, xa entón considerados insuficientes ante as crecentes necesidades do alumnado.
