Máis dun centenar de persoas manifestáronse este venres en Santiago de Compostela “en contra do sionismo e da represión policial” tras as cargas ocorridas o pasado domingo despois da marcha na que miles de persoas esixiron polas rúas da capital galega un alto ao fogo en Palestina e que deixaron nove persoas detidas e, segundo o Sindicato Unificado de Policía (SUP), nove axentes feridos.
Convocados por colectivos como a Rede Galega por Palestina, BDS Galiza e a Asemblea Internacionalista, a marcha partiu pasadas as 19:30 desde a Praza Roxa e os manifestantes desprazáronse ata a Praza 8 de marzo ante un importante despregamento policial. Cunha pancarta coa lema ‘Nove detencións, 0 explicacións’ e entre cánticos como ‘non levamos porras, é unha pancarta’, ‘onde estaba a placa cando me pegabas’ ou ‘aquí choven multas, en Gaza choven bombas‘, máis dun centenar de persoas percorreron as rúas do centro compostelán sen que se rexistrasen incidentes.
FEITOS DO PASADO DOMINGO
As cargas producíronse cando, ao finalizar a protesta, un grupo de manifestantes dirixiuse aos locais de venda de comida rápida que se atopan na rúa da Senra, no centro da capital galega, ao considerar que estas empresas colaboran con Israel. Alí, varios axentes da UIP interviñeron e detiveron a nove persoas.
Estes feitos tamén deron lugar a un cruzamento de declaracións entre o Goberno local e o PP de Santiago, despois de que a portavoz do Executivo de Goretti Sanmartín, Míriam Louzao, manifestase que, “polo que transcendeu e as imaxes”, a intervención policial parecía “algo excesiva”. Unhas declaracións que o portavoz dos populares cualificou de “imprudentes”.
