O Arquivo da Catedral de Santiago celebrará unhas xornadas de portas abertas do 4 ao 7 de xuño para que calquera cidadán poida acceder e coñecer directamente os espazos e o seu funcionamento.
Esta actividade desenvólvese no marco da celebración do Día Internacional dos Arquivos, que é o 9 de xuño, coa que se conmemora a creación do Consello Internacional de Arquivos en tal día do ano 1948.
As visitas realizaranse ás 10,30 e ás 18,00 horas, a duración de cada unha é de 60 minutos aproximadamente e en grupos de ata 15 persoas. Ademais, é imprescindible realizar unha reserva previa.
As visitas constarán dun percorrido explicativo polas estancias do Arquivo e Biblioteca, con acceso non só á área pública senón tamén ás salas de catalogación e aos depósitos bibliográficos e archivísticos, onde se custodia o valioso patrimonio documental da Catedral, incluíndo a Sala Capitular e a Biblioteca Histórica Capitular.
Na Sala López Ferreiro poderán apreciar tres documentos orixinais dos máis representativos do Arquivo: o Códice Calixtino, o Tombo A e o Breviario de Miranda.
Na Biblioteca Capitular visitarase a exposición “Eu oin à meus abòs: Escrita galega nos cregos dá catedral compostelá” con motivo do Día das Letras Galegas. Os documentos permanecerán expostos desde o día 17 de maio ata o día 9 de xuño.
