A directora xeral de Patrimonio Cultural, María del Carmen Martínez, participou este mércores en Zaragoza na xornada Patrimonio Cultural Aragonés, onde puxo en valor o Camiño de Santiago xunto con responsables de Castela e León, A Rioxa e Navarra.
Neste contexto, a responsable galega subliñou a importancia de que se fale de Galicia e que cause interese neste tipo de foros en calquera parte do Estado. Isto, afirmou, “reafirma o seu papel na historia e na cultura máis aló das súas fronteiras, cun Camiño de Santiago que representa unha manifestación tan singular do patrimonio cultural tanto material como inmaterial, aportando valor a un conxunto de territorios”.
A programación da xornada centrouse na visibilización do patrimonio cultural e as súas posibilidades, destacando a relevancia da Ruta Xacobea, nas súas diversas variantes, como un elemento esencial dese patrimonio.
