Este mércores, día 22 de maio, o Ateneo de Santiago realizará un Faladoiro de actualidade titulado ‘Como se pode ser máis sustentable?’. O acto, que terá lugar ás 19:00 no Salón de Actos Isaac Díaz Pardo da súa sede social, sita na Praza de Salvador Parga, 4-2º, estará conducido por Álvaro Silva, doutor en Enxeñaría Química e Ambiental pola USC.
Ao longo do evento farase un percorrido histórico no que se descubrirán os acontecementos que nos levaron ata o actual cambio climático, explorando en que actividades diarias dos cidadáns galegos se producen os principais impactos e achegando medidas sinxelas para reducilos. Tamén se realizará unha aproximación ao funcionamento das infraestruturas necesarias en Galicia e Compostela para o tratamento dos residuos e en que puntos se aplican ferramentas baseadas na economía circular.
Álvaro Silva Teira, doutor en Enxeñaría Química e Ambiental pola USC, máster en Enxeñaría de Procesos Químicos e Ambientais e enxeñeiro químico pola mesma universidade, dispón dun programa en Sustentabilidade obtido no Massachusetts Institute of Technology (MIT) de Boston e actualmente está finalizando un Executive MBA na EAE Business School de Barcelona e Madrid. Foi líder de proxectos europeos en Cetaqua Galicia e director de produción en OXIDINE Water Technology.
