O Arquivo-Biblioteca da Catedral de Santiago abrirá as súas portas á cidadanía entre o 8 e o 12 de xuño con motivo do Día Internacional dos Arquivos, que se celebra cada 9 de xuño en lembranza da creación, en 1948, do Consello Internacional de Arquivos. A iniciativa está organizada polo Cabido da S. A. M. I. Catedral de Santiago de Compostela e polo propio Arquivo-Biblioteca, co obxectivo de difundir o valor dos arquivos como espazos ao servizo da investigación, a cultura, a memoria e a transparencia.
As xornadas permitirán coñecer de primeira man o funcionamento do Arquivo Catedralicio, así como algunhas das súas dependencias e fondos documentais. As visitas serán guiadas e gratuítas, con reserva previa, e desenvolveranse sen interromper os servizos habituais do centro, incluída a consulta en sala.
O percorrido incluirá unha explicación polas estancias do Arquivo e da Biblioteca, con acceso tanto ás zonas públicas como a espazos de traballo interno, entre eles as salas de catalogación e os depósitos bibliográficos e arquivísticos. Nestes lugares consérvase unha parte destacada do patrimonio documental da Catedral de Santiago. A visita permitirá tamén acceder á Sala Capitular e á Biblioteca Histórica Capitular.
Un dos puntos principais do itinerario será a Sala López Ferreiro, onde se poderán ver tres documentos orixinais representativos dos fondos catedralicios. Entre eles estará o Códice Calixtino, considerado unha das pezas documentais máis relevantes de Galicia e da Igrexa en España, cun papel fundamental para o estudo do culto ao Apóstolo Santiago e do Camiño de Santiago.
Xunto a el, mostrarase o Tumbo A, un cartulario dos séculos XII e XIII ilustrado con retratos de reis de Asturias, Galicia, León e Castela. Tamén se poderá contemplar o Breviario de Miranda, un manuscrito litúrxico realizado no século XV no que destacan as súas miniaturas.
A programación complétase coa visita á exposición ‘El Códice Calixtino: ediciones y traducciones’, instalada na Biblioteca Capitular. A mostra organízase con motivo da presentación, o pasado 4 de xuño na Sala Capitular, dunha nova edición facsímil mellorada do códice. A exposición poderá visitarse entre o 6 de xuño e o 6 de xullo.
As visitas terán unha duración aproximada de 60 minutos e estarán limitadas a grupos dun máximo de 15 persoas. Ao remate do percorrido, as persoas participantes recibirán un agasallo de lembranza.
Os horarios previstos son o luns 8, martes 9, mércores 10 e xoves 11 de xuño, ás 10:30 e ás 18:00, mentres que o venres 12 de xuño haberá unha única quenda ás 10:30. Para participar é imprescindible realizar reserva previa, aberta ata completar prazas e, como máximo, ata unha hora antes de cada visita. Cada reserva poderá incluír ata catro persoas.
As reservas formalizaranse por estrita orde de recepción das chamadas ou correos electrónicos. A organización solicita que se absteñan de inscribirse aquelas persoas que xa participasen nas visitas en edicións anteriores, para facilitar que poidan acceder novos visitantes.
A información e as reservas poden realizarse a través do teléfono 981 57 56 09, en horario de atención de luns a venres de 09:00 a 13:30 e de luns a mércores de 16:30 a 19:00, ou no correo electrónico archivo@catedraldesantiago.es. A información sobre a institución tamén está dispoñible na web do Arquivo-Biblioteca da Catedral de Santiago.
