O Bosque do Banquete de Conxo acolle unha notable riqueza faunística, con 73 especies animais identificadas, segundo recolle o recentemente publicado Informe de Biodiversidade Faunística do Bosque do Banquete de Conxo. O documento, elaborado no marco do proxecto ecoBosque impulsado polo Concello de Santiago, ofrece unha análise detallada dos valores naturais deste espazo periurbano e establece unha base científica para orientar futuras actuacións de conservación e restauración ambiental.
A concelleira de Dereitos e Servizos Sociais, Promoción Económica e Xuventude, María Rozas, destacou que este informe “volve evidenciar a riqueza natural desta zona, que debemos seguir protexendo e recuperando”.
O traballo responde á vontade de ampliar o coñecemento ecolóxico da contorna do Banquete de Conxo e do río Sar, así como de facilitar á cidadanía información actualizada sobre os seus recursos naturais. A publicación do documento dá cumprimento ademais a unha das demandas formuladas durante o proceso participativo do proxecto ecoBosque, tanto nas mesas de diálogo celebradas en marzo como no Consello constituído en abril.
O estudo foi desenvolvido durante a primavera de 2026 coa colaboración de diversas entidades especializadas en conservación da natureza, entre elas ADEGA, SEO BirdLife, Morcegos Galicia, Sorex Ecoloxía e Medio Ambiente, a Sociedade Galega de Historia Natural e persoal técnico municipal. A investigación permitiu realizar unha avaliación detallada dos ecosistemas presentes neste ámbito, caracterizado pola coexistencia de hábitats fluviais, bosques de ribeira, masas arbóreas maduras, zonas húmidas e espazos abertos.
Entre as especies detectadas figuran 8 especies de anfibios, 46 especies de aves, 5 especies de morcegos e 14 especies de mamíferos terrestres. Parte desta fauna está incluída en diferentes figuras de protección autonómicas, estatais e europeas. O informe sinala tamén a presenza de especies consideradas de especial interese para a conservación, recollidas no Listado de Especies Silvestres en Réxime de Protección Especial (LESRPE), así como nos catálogos español e galego de especies ameazadas.
Ademais da análise da fauna, o documento incorpora unha avaliación do estado ecolóxico do río Sar ao seu paso polo Banquete de Conxo. As mostras realizadas permitiron examinar tanto parámetros biolóxicos como físico-químicos da auga. Os resultados revelan a existencia de diversas presións ambientais, entre elas unha elevada concentración de nitratos nun dos puntos analizados e os efectos acumulados de transformacións históricas sufridas polo ecosistema fluvial.
O informe tamén identifica varios factores que condicionan a conservación da biodiversidade da zona. Entre as principais ameazas destacan a fragmentación dos hábitats, a expansión urbana, a presenza de especies exóticas invasoras, a contaminación acústica e lumínica e a deterioración da calidade da auga. Ante esta situación, os autores consideran necesario continuar desenvolvendo actuacións de restauración ecolóxica, reforzar a conectividade ambiental dos distintos hábitats e manter programas de seguimento científico a medio e longo prazo.
O proxecto ecoBosque, promovido polo departamento de Emprego do Concello de Santiago e financiado a través do Plan de Recuperación, Transformación e Resiliencia mediante a Fundación Biodiversidade, ten como finalidade avanzar na renaturalización da contorna do río Sar e poñer en valor este enclave de interese ambiental e histórico. As actuacións previstas combinan medidas de recuperación ecolóxica con actividades de divulgación e participación cidadá para fomentar unha maior implicación social na conservación do patrimonio natural compostelán.
