O espazo exterior da Biblioteca Concepción Arenal, no Campus Vida de Santiago de Compostela, converteuse este mércores nun escenario ao aire libre para desenvolver a actividade teatral ‘De luxo a lixo’, unha iniciativa promovida polo Concello de Santiago dentro da campaña municipal co mesmo nome e centrada na problemática do abandono de residuos voluminosos nas rúas da cidade.
A proposta desenvolveuse como unha peza de teatro participativo, na que o público asistente tivo un papel activo durante a representación. A actividade pretendeu abrir un espazo de reflexión arredor dos hábitos de consumo e da crecente presenza dunha cultura baseada no uso inmediato e na substitución constante dos obxectos. Ao mesmo tempo, buscou ofrecer información práctica á cidadanía sobre as vías axeitadas para desfacerse deste tipo de residuos.
A campaña céntrase especialmente na xestión de materiais de gran tamaño que, en ocasións, son abandonados na vía pública, unha práctica que afecta á limpeza e ao mantemento dos espazos urbanos. A través desta iniciativa, o Concello pretende incidir na sensibilización cidadá e fomentar prácticas máis responsables no tratamento dos residuos.
Tras a representación no campus universitario, o concelleiro de Sustentabilidade Ambiental, Xesús Domínguez, visitou o posto informativo instalado pola campaña na Praza Roxa, un espazo dende o que se continúa trasladando información á veciñanza sobre a correcta xestión destes materiais.
Dende a campaña municipal púxose o foco na necesidade de evitar o depósito inadecuado de residuos voluminosos na rúa, promovendo alternativas que permitan unha eliminación ordenada e respectuosa co espazo público.
