O Ateneo de Santiago, en colaboración co Grupo Histagra da Universidade de Santiago de Compostela, organiza este luns 9, ás 19:30, unha nova sesión dos Luns do Ateneo coa conferencia titulada ‘A fame silenciada do franquismo’. O acto terá lugar na sede de Afundación, situada na Rúa do Vilar, 19, e poderá seguirse tamén en directo a través da web www.ateneodesantiago.gal e da canle de YouTube da entidade.
A conferencia será impartida por Miguel Ángel del Arco, catedrático de Historia Contemporánea da Universidade de Granada, quen estará acompañado por Ramón Villares, catedrático da mesma disciplina na Universidade de Santiago de Compostela. A sesión enmárcase na programación regular do Ateneo dedicada á reflexión e ao debate público arredor da cultura e a sociedade.
A charla propón unha análise da fame como unha das consecuencias máis graves da posguerra franquista, así como dos factores políticos, sociais e simbólicos que contribuíron a ocultar esta realidade durante décadas. A partir da investigación histórica e do diálogo coa memoria colectiva, abordarase a relación entre represión, escaseza material e control social no contexto do réxime franquista.
Miguel Ángel del Arco é un dos principais especialistas no estudo da Guerra Civil, a posguerra e o fascismo en España. As súas investigacións céntranse, entre outros ámbitos, nas actitudes políticas da poboación, a represión, a memoria histórica e a fame durante o franquismo. Entre as súas publicacións máis destacadas atópanse Los años del hambre. Historia y memoria de la posguerra franquista (Marcial Pons, 2020), Cruces de memoria y olvido (Crítica, 2022) e La hambruna española (Crítica, 2025).
