O Museo Catedral de Santiago pechou o ano 2025 cun total de 446.518 visitantes, unha cifra que supón un incremento do 4% con respecto a 2024 e que establece un novo máximo histórico para este equipamento cultural. Os datos inclúen o conxunto de modalidades de visita organizadas desde o museo, tanto ás salas e espazos da colección permanente como ás visitas guiadas ás cubertas, á Torre da Carraca, ao Pórtico da Gloria e ao conxunto monumental da Colexiata de Sar.
A xestión deste último espazo forma parte do programa Compostela Sacra, desenvolvido pola Fundación Catedral de Santiago desde 2016, e integrado na oferta cultural que engloba os principais ámbitos patrimoniais vinculados á Catedral de Santiago.
Entre as novidades máis destacadas de 2025 figura a apertura parcial do Museo Diocesano, situado no antigo mosteiro de San Martín Pinario. Este novo espazo, tamén incluído en Compostela Sacra, comezou a recibir visitantes na primavera, cunha primeira fase centrada na igrexa e na sancristía, á que se sumaron no verán as salas das tullas e do coro alto. Desde finais de ano, o museo pode visitarse na súa totalidade, coa opción de entrada combinada xunto ao Museo Catedral.
Por modalidades de visita, os datos reflicten un crecemento significativo das visitas nocturnas, cun aumento do 17% respecto ao ano anterior. Trátase dunha tipoloxía cada vez máis demandada, baseada en percorridos guiados que permiten achegarse á historia e á arquitectura da Catedral nun contexto de maior tranquilidade e cunha atención máis personalizada.
Ao longo de 2025, o Museo reforzou tamén a súa presenza nas redes sociais, con iniciativas de divulgación dixital que incluíron emisións en directo de visitas a espazos singulares e a publicación de vídeos breves sobre distintas pezas e ámbitos das coleccións artísticas. Estes contidos están dispoñibles no canal oficial do museo en YouTube e forman parte da estratexia de difusión do patrimonio catedralicio a novos públicos.
No eido educativo, arredor de 13.000 escolares participaron durante o ano nos programas didácticos impulsados polo museo. Esta liña de traballo viuse reforzada coa creación de novos materiais e actividades dirixidas tanto ao alumnado como ao profesorado. En colaboración coa Deputación da Coruña, desenvolveuse un programa específico de visitas guiadas centradas na figura do Maestro Mateo, con recursos adaptados ás diferentes idades e dispoñibles para os centros educativos a través da web museocatedraldesantiago.gal.
Así mesmo, organizáronse visitas didácticas ao MuSar, o museo da Colexiata de Sar, orientadas a dar a coñecer a figura do arcebispo Bernardo II, prelado do século XIII cuxo sepulcro, conservado neste conxunto, é o máis antigo que se mantén dun arcebispo compostelán.
Os datos de 2025 confirman a consolidación do proxecto cultural promovido pola Fundación Catedral de Santiago, baseado nun traballo continuado de conservación, investigación e difusión do patrimonio xacobeo, así como na diversificación das propostas de visita e na ampliación dos públicos aos que se dirixe a oferta museística.
