O Grupo Municipal Socialista de Santiago trasladou esta mañá a súa preocupación pola ausencia de dous elementos que considera relevantes para a memoria urbana do barrio das Fontiñas. A concelleira Marta Abal fixo pública esta demanda a partir das queixas recibidas por parte de veciñanza e colectivos da zona.
Segundo explicou Abal, un dos elementos pendentes de reposición é a escultura ‘Maternidade’, realizada en 1975 polo escultor galego Manuel García Vázquez, “Buciños”. Trátase dunha peza en bronce de carácter alegórico que foi retirada do espazo público para a súa rehabilitación, pero que, segundo indicou a edil, continúa sen ser reinstalada e sen que se facilitase información pública sobre o seu estado actual. Dende o PSdeG sinalan que a obra forma parte da identidade visual e simbólica do barrio.
A segunda reclamación refírese á desaparición da placa conmemorativa situada no monólito de Área Central nas Fontiñas, que lembraba a inauguración deste espazo urbano. Para o grupo socialista, a ausencia deste elemento supón tamén unha perda desde o punto de vista da conservación da memoria colectiva da cidade.
A concelleira defendeu que “importa coidar o patrimonio e a memoria colectiva” e subliñou que non se trata de actuacións de gran custo económico, senón de manter en bo estado elementos que forman parte da historia recente de Santiago. Neste sentido, o PSdeG solicitou ao Goberno municipal que preside Goretti Sanmartín a reposición inmediata da escultura de Buciños e a recuperación da placa da área central, co obxectivo de restituír ambos símbolos ao espazo público das Fontiñas.
