Dúas “pequenas biografías” sobre o desenvolvemento de Santiago e Roma durante os Anos Santos compoñen o libro ‘Anos Santos en Roma e Santiago de Compostela desde a Idade Media’, presentado este martes na capital compostelá. A obra realizada polo Instituto de Estudos Galegos Paiu Sarmiento (IEGPS) explora as relacións seculares de “imitación-superación” das dúas cidades que, segundo o seu autor, Antón M. Pazos, acaban “competindo” por protagonismo na Cristiandade.
“Hai unha relación moi estreita entre Santiago e Roma porque están a competir, unha con outra, dalgunha maneira. Santiago quere ser unha Roma deste lado do Occidente”, subliñou o autor e científico vinculado ad honórem ao Consello Superior de Investigacións Científicas en Galicia (CSIC). Así as cousas, o autor chanceou que “Santiago é unha cidade claramente gañadora” da disputa, aínda que a capital galega e Roma non “xoguen na mesma liga”. “Abonda con que eu diga: ‘Veño de Santiago de Compostela’, e xa está”, sinalou. Por iso, Pazos recalcou que a xente que el coñece adoita dividirse en dous grupos: os que estiveron en Santiago e os que aínda queren coñecela: “Santiago é gañadora, clarísimamente”.
O ESPELLO DE ROMA
Pero a verdade, segundo Pazos, é que hai unha certa miraxe de Santiago fronte a Roma. “É dicir, Santiago mírase no espello de Roma e quere, dalgunha maneira, imitala”, matizou. Nesta liña, o autor explicou que este foi a formulación feita por el e máis expertos para, dalgún modo, analizar esas estreitas relacións entre Roma e Santiago, e a importancia que teñen os Anos Santos para a vida das cidades.
Así, os capítulos de ‘Anos Santos en Roma e Santiago de Compostela desde a Idade Media’ van describindo o que foron os Anos Santos e como estes eventos produciron transformacións en ambas as urbes. “Neses Anos Santos houbo novas rúas, novos acueductos, novas igrexas, multitude de obras de artes que se fixeron precisamente para o Ano Santo…”, suliñou.
Ademais do autor do libro, a presentación contou coas intervencións do director do IEGPS, Pablo Otero Piñeyro Maseda; a vicedirectora do IEGPS, Amparo Rubio Martínez; e o director da Axencia de Turismo de Galicia, Xosé Manuel Merelles Remy.
