O PP de Santiago desenvolveu na noite deste xoves unha visita nocturna á Catedral de Santiago, unha proposta enmarcada no programa cultural ‘CompArte’, co que a formación pretende abrir espazos para o diálogo e a participación arredor da vida cultural da cidade. Trátase dunha iniciativa que, segundo lembran desde o grupo municipal, xa ten incluído conferencias, proxeccións e encontros abertos ao público.
A actividade permitiu percorrer o templo en horario nocturno, ofrecendo unha mirada pouco habitual á súa arquitectura e a determinados espazos que non adoitan formar parte das visitas ordinarias. Ao longo do percorrido, o portavoz popular, Borja Verea, subliñou a impresión que lle produce este tipo de experiencia, apuntando que “a emoción profunda que produce contemplar a Catedral en silencio, coa serenidade da noite, e tomar conciencia de que este templo segue a inspirar á mesma xente que inspirou ao longo de séculos”.
Verea fixo fincapé na necesidade de protexer e proxectar o valor da Catedral para o futuro, afirmando que “a importancia de protexer e promover o valor do monumento pensando nas próximas xeracións”. Engadiu que “a Catedral de Santiago non é só o corazón espiritual de Europa, é tamén un motor cultural e económico. O que fagamos hoxe para coidala e difundila determinará como a vivirán os composteláns do futuro”.
O líder popular incidiu tamén en que “Santiago ten a responsabilidade e o privilexio de ser gardiá dun patrimonio único no mundo”, ao tempo que defendeu que a cidadanía compostelá “viva a Catedral non só como un símbolo universal, senón como un espazo de referencia para construír unha cidade máis viva, máis orgullosa de si mesma e máis aberta ao futuro”.
