O concelleiro de Urbanismo, Vivenda e Cidade Histórica de Santiago, Iago Lestegás, participou este venres en Toledo na reunión do Grupo de Cidades Patrimonio da Humanidade coa Conferencia de Reitores e Reitoras das Universidades Españolas (CRUE). O encontro serviu para reforzar a alianza entre as universidades e as cidades con este recoñecemento da UNESCO, unha iniciativa que fora impulsada pola USC na asemblea celebrada en Compostela o pasado mes de marzo baixo presidencia do Concello.
O alcalde de Toledo, Carlos Velázquez, presidiu a sesión, na que destacou o convenio entre o Grupo de Cidades Patrimonio e a CRUE co obxectivo de “xerar sinerxías entre universidades e cidades para impulsar proxectos en materia de conservación do patrimonio, sustentabilidade e desenvolvemento urbano”. Pola súa banda, o presidente do Grupo e alcalde de Segovia, José Mazarías, cualificou o encontro de “punto de partida operativo” para promover accións concretas entre ambos ámbitos, especialmente na xestión sostible do turismo, a dixitalización e a adaptación ao cambio climático.
O reitor da USC e presidente do grupo universitario vinculado ao patrimonio, Antonio López, salientou que “as cidades e as universidades compartimos unha misión común: preservar o pasado para construír un futuro máis inclusivo”. Considerou que o convenio “é unha oportunidade para crear un ecosistema de aprendizaxe mutua e fortalecer a identidade e a proxección internacional das nosas cidades”. Entre as liñas de traballo acordadas figuran a formación de profesionais en xestión do patrimonio, a creación dun observatorio universitario sobre patrimonio e sustentabilidade, a organización de foros anuais de intercambio de coñecemento e o desenvolvemento de proxectos piloto de innovación urbana.
Tamén participou o reitor da Universidade de Castela-A Mancha, José Julián Garde, quen destacou a importancia do grupo de traballo “para poñer en común estratexias de conservación do patrimonio e promover un modelo de universidade comprometida coa súa contorna patrimonial”.
A reunión en Toledo celebrouse coincidindo co 40º aniversario da declaración da cidade como Patrimonio da Humanidade e da creación da Universidade de Castela-A Mancha, efemérides que, segundo Velázquez, “fan deste encontro un momento de celebración compartida e de renovación dos compromisos coa cultura e coa investigación”.
O presidente do Grupo, José Mazarías, lembrou que este 2025 tamén se conmemoran os 40 anos das primeiras declaracións patrimoniais da UNESCO —entre elas as de Santiago de Compostela, Ávila e Segovia— e os 30 anos da constitución do Grupo de Cidades Patrimonio da Humanidade de España, fundado en 1993 para coordinar políticas de defensa e posta en valor do patrimonio histórico e cultural común.
