O Ateneo de Santiago acollerá o vindeiro luns 10 ás 19:30, no salón de actos de Afundación (rúa do Vilar, 19) a conferencia titulada ‘Santiago de Compostela é algo máis’, impartida polos arquitectos Xerardo Estévez Fernández e Alfonso Salgado Suárez. A actividade forma parte do programa co que a entidade quere promover a reflexión sobre a cidade coincidindo co 40º aniversario da súa inclusión na Lista do Patrimonio Mundial da UNESCO.
O encontro pretende actualizar o significado e a proxección de Santiago no contexto global, partindo da súa realidade xeográfica, arquitectónica e social. Os relatorios abordarán cuestións de fondo como o impacto do turismo, as dificultades de acceso á vivenda, a mobilidade urbana e os retos da sustentabilidade, con especial atención á preparación da cidade para o Ano Xubilar 2027.
Xerardo Estévez, arquitecto e alcalde de Santiago entre 1983 e 1998, foi un dos principais impulsores do rexurdimento urbanístico e cultural da capital galega nas últimas décadas. Autor e coautor de diversos traballos sobre Compostela e o seu territorio, Estévez defenderá unha visión integradora da cidade como espazo de convivencia entre a memoria e a innovación.
Pola súa banda, Alfonso Salgado, profesor da Escola Técnica Superior de Arquitectura da Coruña e socio fundador do estudo Salgado e Liñares arquitectos —galardoado co Premio de Arquitectura Española 2020—, achegará a súa experiencia na intersección entre patrimonio e cidade contemporánea, combinando práctica profesional, docencia e investigación.
