Ducias de veciños e veciñas da Sabugueira participaron este venres, 24 de outubro, nun encontro convocado polo Concello de Santiago para dar conta dos avances na redacción do Plan especial director de ordenación e rehabilitación do Camiño Francés, documento que orientará as actuacións urbanísticas e de conservación neste itinerario xacobeo ao seu paso polo termo municipal.
A xuntanza contou coa presenza da alcaldesa, Goretti Sanmartín, acompañada polos concelleiros Iago Lestegás (Urbanismo), Pilar Lueiro (Medio Rural) e Xesús Domínguez (Vías e Obras). Xunto á delegación política, participaron tamén membros do equipo técnico municipal e do Consorcio de Santiago, entre eles Ana Prieto, directora da área de Urbanismo; Pilar Rubín, xefa de Xestión Urbanística; e Lourdes Pérez, arquitecta responsable da redacción do plan.
Durante a asemblea, aberta a toda a veciñanza, o goberno local explicou as modificacións incorporadas ao documento, aprobado inicialmente en 2022, froito dun amplo proceso de diálogo cos residentes da zona. Estas actualizacións buscan compatibilizar a protección do patrimonio cultural e paisaxístico coas necesidades vitais e produtivas das persoas que viven no rural compostelán.
Ademais, Sanmartín e os concelleiros presentes deron conta das actuacións xa realizadas e das previstas na parroquia, en materias como infraestruturas, mobilidade ou mantemento de camiños. Como en anteriores encontros con entidades veciñais, o Concello recolleu novas propostas e demandas para seguir mellorando a calidade de vida das parroquias e reforzar a participación cidadá na planificación territorial.
O Plan especial do Camiño Francés, que abrangue todo o trazado desta ruta dentro do municipio, pretende servir de ferramenta de equilibrio entre a conservación dun patrimonio de valor universal e o desenvolvemento sostible das comunidades locais.
