O Museo do Pobo Galego celebrará o vindeiro mércores, 29 de outubro, o seu 48º aniversario cun acto especial no que recibirá o Premio Pedra do Destino, un recoñecemento que a asociación Amigos dos Museos de Galicia concede cada ano a entidades e persoas que destacan polo seu labor na preservación, difusión e estudo do patrimonio cultural galego.
A cerimonia pública terá lugar no Auditorio do Museo, en Santiago de Compostela, a partir das 18:30, e servirá como homenaxe a unha institución que desde a súa creación en 1977 mantén un compromiso constante coa recuperación e posta en valor da cultura popular galega.
O premio, que se entrega desde 1988, consiste nun cartel de cego orixinal dos primeiros anos do século XX, símbolo da tradición e da memoria colectiva de Galicia. A asociación destacou que nesta edición o Museo é distinguido “polo traballo e misión exemplar en canto significa a recolleita de materiais da tradición popular, polo seu estudo, conservación e divulgación por todas as canles posibles e normas museolóxicas e pola súa necesidade de ser, constancia e saber nos fíns e na profesionalización destas institucións”.
Con este galardón, Amigos dos Museos de Galicia subliña a traxectoria do Museo do Pobo Galego como referente no estudo da identidade galega e como espazo vivo que continúa a fomentar o diálogo entre tradición e contemporaneidade a través das súas exposicións, actividades e proxectos de investigación.
