O arcebispo de Santiago de Compostela, Francisco Prieto, atópase estes días en Dallas (EE. UU.) para formalizar un acordo de colaboración co Meadows Museum, institución coa que a Igrexa compostelá mantén relacións culturais desde hai anos.
O convenio, asinado como continuidade do rubricado o pasado 25 de setembro en Santiago, permitirá organizar unha gran exposición no ano 2027, coincidindo co Ano Santo Compostelán, que mostrará nos Estados Unidos unha selección destacada das mellores pezas artísticas da Catedral de Santiago.
Xunto ao arcebispo participan nesta viaxe o deán da Catedral, Manuel Jesús Formoso; o director da Fundación Catedral, Daniel Lorenzo, e o director técnico do Museo da Catedral, Ramón Yzquierdo, que supervisarán os detalles técnicos e curatoriais da futura mostra.
