Representantes de UCIN Santiago achegáronse esta semana á rúa Suarribas, no barrio de Conxo, para visitar a vivenda dun veciño afectado por inundacións recorrentes debido ao estado do río Sar no seu tramo urbano. Segundo explicou o residente, cada episodio de choiva intensa supón unha ameaza, con rexistros de encharcamentos graves nos últimos anos.
O afectado atribúe estes problemas á acumulación de maleza, árbores caídas e restos no leito do río, que favorecen os desbordamentos. Durante a visita, os membros de UCIN constataron a presenza de ribeiras ateigadas de vexetación, troncos e lixo, así como a ausencia de rozas e de planificación municipal para a conservación desta contorna fluvial.
“Trátase dun espazo natural que debería ser un orgullo para Santiago, pero que se converteu nun risco constante para os veciños”, sinalaron desde UCIN, que consideran esta situación un exemplo da “deixadez municipal co barrio de Conxo”.
O partido formulou tres peticións concretas ao Concello: a limpeza inmediata do tramo do Sar en Suarribas, a creación dun plan regular de mantemento e seguimento e a apertura dun canle de diálogo cos veciños afectados.
Desde UCIN aseguran que continuarán trasladando as demandas da veciñanza: “Non se pode permitir que familias enteiras vivan coa incerteza de se a próxima chuvia volverá entrar nas súas casas mentres a administración mira para outro lado”.
