Santiago de Compostela será escenario dun congreso internacional sobre infraestrutura verde e renaturalización urbana, enmarcado no proxecto ‘Entre Sar e Sarela’. A iniciativa, impulsada para reforzar a conectividade ecolóxica entre o anel verde exterior e a trama urbana, conta co respaldo da Fundación Biodiversidad do Ministerio para la Transición Ecológica y el Reto Demográfico e está financiada pola Unión Europea-NextGenerationEU.
O obxectivo do encontro é analizar como as cidades, espazos onde se concentra a poboación e as principais actividades económicas, poden adaptarse ao cambio climático mediante solucións baseadas na natureza. A creación e consolidación de parques, bosques urbanos, corredores ecolóxicos e outros proxectos de restauración ambiental considéranse ferramentas eficaces para reducir riscos climáticos, protexer a biodiversidade e mellorar a saúde e benestar da cidadanía.
O programa reunirá especialistas nacionais e internacionais en biodiversidade, urbanismo e sostibilidade, que abordarán estratexias para integrar a infraestrutura verde nas políticas urbanas. Entre as experiencias que se presentarán figuran os proxectos de Valladolid e Santiago de Compostela, así como actuacións desenvolvidas en Salamanca, Vitoria-Gasteiz ou Santander.
O congreso prestará atención tamén ao marco xurídico destas infraestruturas e dará a coñecer proxectos pioneiros de restauración ecolóxica promovidos pola Xunta de Galicia. A xornada pecharase cunha visita ás actuacións en marcha no marco do proxecto ‘Entre Sar e Sarela’.
O programa completo pode consultarse na web do CEIDA: www.ceida.org.
