A veciñanza de Santiago de Compostela recolleu un total de 4.040 quilos de aceite doméstico usado nos meses de xuño e xullo, primeiros de funcionamento dos novos colectores instalados polo Concello. Segundo os datos da área de Servizos Básicos e Sustentabilidade, que dirixe Xesús Domínguez, esa cantidade supón evitar a contaminación de arredor de 4.444.000 litros de auga e permitirá xerar biocarburante co que se reducirán en 12,12 toneladas as emisións de CO₂.
O sistema estreouse en xuño con 1.900 quilos de aceite recollido, cifra que se incrementou en xullo ata os 2.140 quilos. Para facilitar a separación deste residuo, o Concello instalou máis de 70 colectores a pé de rúa en diferentes barrios da cidade, sen esquecer a recollida que continúa a realizarse nos centros socioculturais.
O concelleiro Domínguez destacou que “os primeiros datos son moi positivos” e valorou a implicación cidadá, lembrando que o aceite debe depositarse sempre en botellas pechadas. Tamén animou á veciñanza a seguir utilizando estes puntos de recollida para contribuír á protección ambiental.
A normativa estatal obriga ás entidades locais a establecer a recollida separada de aceite vexetal usado, como recolle a Lei 7/2022, de residuos e solos contaminados para unha economía circular. O obxectivo é favorecer a reutilización e o reciclado de alta calidade, xa que o aceite usado pode empregarse non só na fabricación de biodiésel, senón tamén en sectores como a cosmética, as pinturas e vernices ou a produción de velas.
As verteduras polo sumidoiro, ademais de contaminar a auga —un só litro pode afectar a 1.000 litros—, provocan problemas nos procesos de depuración e atrancos nas tubaxes, tanto municipais como particulares. A aposta pola separación en orixe, subliñan desde o Concello, é esencial para previr estes impactos negativos e dar un novo uso a un residuo moi contaminante.
