O Concello de Santiago confirmou que o pasado martes 19 de agosto concluíu a recepción de ideas para o Concurso Internacional de Iluminación Ornamental e Artística da contorna monumental da Catedral. O chamamento pechouse con 26 propostas remitidas por equipos e estudos con traxectoria en proxectos de iluminación patrimonial, procedentes de Reino Unido, Alemaña, Italia, Finlandia, así como do Estado español e de Galicia. A iniciativa busca unha solución lumínica para o conxunto de prazas que arrodean o templo —Obradoiro, Praterías, Quintana e Inmaculada— e os seus elementos conectores, co obxectivo de mellorar o confort visual e a calidade de vida da veciñanza, ao tempo que se reforza a experiencia das persoas visitantes nun ámbito declarado Patrimonio Mundial pola UNESCO.
A convocatoria desenvolveuse ao abeiro do Plan de Sostibilidade Turística da cidade e articúlase como un proxecto de cooperación entre o Estado, a Xunta e o Concello, cun enfoque centrado na sustentabilidade, o respecto pola identidade histórica e a proxección internacional do talento creativo. A proposta definitiva asumirá a redacción do proxecto e a dirección de obra para a iluminación da praza de Praterías, definida como proxecto piloto desta estratexia, cun orzamento de 100.000 euros (IVE excluído). Ademais, até seis finalistas, incluída a proposta gañadora, percibirán 15.000 euros cada un en concepto de gratificación económica.
O proceso de selección é anónimo e en dúas fases e contará coa intervención dun xurado independente no que participan persoal técnico das administracións implicadas e diversas figuras do deseño e da arquitectura. Entre elas figuran os nomes de ‘David Chipperfield’, ‘Teresa Táboas’, ‘Roger Narboni’, ‘Esther Torelló’ e ‘Manuel Castiñeiras’, quen deberán avaliar a calidade do deseño lumínico, a viabilidade técnica e económica, así como os criterios de eficiencia, innovación e sustentabilidade incorporados nas candidaturas.
A difusión do concurso apoiouse nunha campaña específica baixo o lema ‘Compostela nocturna, mírame!’, con materiais audiovisuais en galego, castelán e inglés e unha web trilingüe con documentación técnica, guía rápida e recursos descargables. Esta estratexia, coordinada pola Oficina técnica do concurso xestionada por ‘Trivium’, contou coa colaboración de entidades do sector como ‘Light Collective’ e ‘SlowLight’ e incluíu contidos divulgativos e entrevistas dirixidos a posicionar Santiago no mapa internacional da innovación lumínica. A distribución en redes sociais e en plataformas profesionais de deseño lumínico e urbanismo da luz contribuíu a atraer candidaturas de diferentes países e perfís, reforzando a dimensión internacional dun proceso que pretende releer, con sensibilidade estética e vangarda técnica, a paisaxe nocturna do corazón histórico compostelán.
Co peche do prazo e a recepción das propostas, o concurso entra agora na súa fase de análise, na que o xurado determinará as candidaturas finalistas que avanzarán ao encargo do proxecto piloto en Praterías. A intervención prevista concíbese como modelo de referencia para futuras actuacións nas prazas circundantes, co foco posto nun equilibrio entre conservación patrimonial, calidade ambiental e experiencia urbana.
