A portavoz de Sumar no Congreso, Verónica Martínez Barbero, declarou este venres en Santiago que o proxecto industrial de Altri en Palas de Rei constitúe un “atentado” contra a saúde pública, o medio ambiente e os sectores produtivos do rural. Fíxoo nunha comparecencia ante os medios nas inmediacións do complexo administrativo da Xunta, onde acusou ao presidente Alfonso Rueda de “inventar unha Galicia do século XIX que non existe”.
Barbero afirmou que o rexeitamento a esta macroplanta de celulosa, promovida pola empresa portuguesa Altri xunto a Greenalia, é común a todas as frontes de Sumar, tanto no Congreso, como en Europa e desde os ministerios que coordina a coalición. Nesta liña, anunciou que o ministro de Cultura, Ernest Urtasun, enviou esta mesma mañá unha carta ao presidente da Xunta para advertir do impacto que podería ter o proxecto no Camiño de Santiago, declarado Patrimonio da Humanidade pola Unesco.
Segundo explicou, a misiva, escrita en galego, subliña que non se poderá colocar “nin unha soa pedra” sen contar co informe do órgano consultivo da Unesco, dada a proximidade do emprazamento ao trazado do Camiño. Tamén recolle a preocupación do Goberno estatal ante a “ameaza para o turismo, o sector primario, a saúde da poboación e os ecosistemas”.
Durante a comparecencia tamén interveu a eurodeputada Estrela Galán, quen instou á Xunta a escoller entre “estar coa xente ou coas elites empresariais”, e sinalou que se está a impulsar unha acción na Comisión Europea para frear o proxecto. Galán cualificou Altri de “aberración ambiental” e criticou que se ignore o forte rexeitamento social xerado.
A xornada de Sumar en Galicia inclúe visitas á comarca da Ulloa, onde se reunirán coa plataforma Ulloa Viva, e aos concellos de Touro e Noia, para manter encontros con colectivos en defensa do territorio e contra proxectos extractivos. Segundo o secretario xeral de Movemento Sumar Galicia, Paulo Carlos López, estas visitas buscan coñecer “de primeira man as consecuencias que pode ter o apoio da Xunta a este tipo de iniciativas industriais”.
Ademais, López anunciou que este sábado comezará a campaña ‘Traballar menos, vivir mellor’, coa que a formación pretende impulsar a redución da xornada laboral. Segundo sinalou, esta medida beneficiaría en Galicia a 600.000 persoas, o que suporía liberar “6 millóns de horas ao mes para investilas no que queremos”.
