O Festival Atlántica de Narración Oral, que celebra desde Santiago de Compostela a diversidade das historias vencelladas ao universo atlántico, vén de estrear unha nova iniciativa que combina divulgación, memoria e arte gráfica. Trátase do ‘Mapa de seres máxicos do Reino de Galicia’, unha peza que reúne 34 personaxes fantásticos da tradición oral galega, acompañada dun folleto explicativo que serve como guía para coñecer a súa historia e contexto xeográfico.
O proxecto, que reivindica a riqueza do imaxinario tradicional galego, é froito da colaboración entre Manuel Gago, xornalista e profesor na Universidade de Santiago de Compostela, e Leandro Lamas, ilustrador cunha ampla traxectoria no ámbito artístico galego. Gago encargouse dos contidos e a contextualización histórica, mentres que Lamas achegou o seu recoñecible estilo visual para dar vida ás figuras representadas.
Entre os seres representados no mapa figuran alarbios, urcos, maruxainas, xigantes, xacias, trasnos ou lobishomes, entre outros, moitos deles vinculados a lugares concretos de Galicia e recollidos en fontes modernas e da Idade Moderna. A publicación constitúe tamén unha homenaxe ao primeiro mapa do Reino de Galicia, elaborado por Hernando de Ojea no século XVII, e aos cegos das feiras, que divulgaban romances e historias apoiándose en imaxes ilustradas.
A edición, de carácter limitado con só 400 exemplares, presenta un formato de 50×70 cm e estará á venda nas funcións do Festival Atlántica en Compostela, cun prezo de lanzamento de 25 euros. As persoas interesadas de fóra da cidade poderán solicitalo a través do correo electrónico festivalatlantica@gmail.com ou da páxina web festivalatlantica.gal.
O mapa busca ser non só un obxecto decorativo, senón tamén un instrumento para a narración oral, a exploración do territorio e a recuperación da memoria popular galega, poñendo en valor personaxes que, nalgúns casos, caeron no esquecemento. Así, o Festival Atlántica continúa a súa aposta pola divulgación cultural e identitaria, achegando o pasado lendario ao presente a través de linguaxes contemporáneas.
