Santiago de Compostela converterase entre o 14 e o 17 de xullo nun novo punto de encontro internacional sobre as peregrinacións a través das XVI Leccións Xacobeas Internacionais, organizadas pola Cátedra Institucional do Camiño de Santiago e das Peregrinacións e incluídas na programación de verán da Universidade de Santiago de Compostela.
Un dos nomes destacados desta edición será o da profesora estadounidense Maryjane Dunn, docente de español na Southwest Minnesota State University e tradutora ao inglés do ‘Liber Sancti Jacobi’, máis coñecido como Códice Calixtino, o manuscrito medieval máis relevante sobre o culto a Santiago e o fenómeno das peregrinacións. A súa conferencia terá lugar o luns 14 de xullo ás 13:00, baixo o título ‘Os segredos do Liber Sancti Jacobi-Códice Calixtino’, dentro da primeira xornada do encontro dedicada aos “sabios do Camiño”.
Ese mesmo día, o historiador da arte Manuel Castiñeiras, catedrático na Universidade de Barcelona e presidente do Comité Internacional de Expertos do Camiño, abrirá as sesións cunha análise sobre os centros de peregrinación no Mediterráneo medieval. Pola tarde, os tres relatores protagonizarán un coloquio dirixido polo podcaster Raúl Fernando Gómez, no Auditorio Robert Plötz do Centro Internacional de Acollida ao Peregrino.
O programa continuará con intervencións sobre cuestións actuais, como a análise da presenza de garrapatas no tramo O Cebreiro-Santiago, a cargo da investigadora da USC Susana Remesar, e outras centradas na perspectiva de xénero e na historia social da peregrinación, como a intervención da profesora da Universidade de Oviedo María Álvarez Fernández, que falará o día 16 sobre a espiritualidade das mulleres peregrinas na Europa medieval.
Tamén se presentarán proxectos de investigación financiados pola Cátedra, traballos de fin de máster e unha visita guiada aos tesouros da Catedral, conducida por Ramón Yzquierdo Peiró, director técnico do Museo da Catedral. A programación culminará cunha ‘andaina’ polo Camiño Primitivo, entre O Acebo e A Fonsagrada, o xoves 17, na que se incluirá unha visita á catarata da Seimeira de Vilagocende.
As persoas interesadas en asistir poden inscribirse presencialmente no Pazo de San Xerome (Santiago) ou no Pazo de Montenegro (Lugo), así como a través da web da USC. A matrícula xeral é de 120 euros, con tarifa reducida de 70 euros para estudantes, desempregados, pensionistas e membros da comunidade universitaria. A asistencia recoñecerase con 2 créditos ECTS para alumnado de grao da USC e 10 horas para estudantes de doutoramento.
Os directores do encontro son Domingo González Lopo, especialista en comportamentos relixiosos na Galicia moderna, e Miguel Taín Guzmán, catedrático da USC e fundador das Leccións Xacobeas. Con este novo encontro, Compostela reafirma a súa condición de espazo de reflexión e coñecemento sobre un fenómeno que marcou a súa historia e identidade.
