A Universidade de Santiago de Compostela acollerá nas vindeiras semanas novas actividades do proxecto divulgativo Física Cíborg, centrado na historia da ciencia a través dos instrumentos e espazos que marcaron a evolución do coñecemento científico na cidade.
As propostas inclúen rutas urbanas guiadas e obradoiros demostrativos, dirixidos a un público maior de 13 anos e orientados á divulgación do patrimonio científico da USC e da Universidade de Valencia. Ambas actividades están abertas a grupos, cun límite de participación de 30 persoas nas rutas e 15 nos obradoiros, e contan cunha duración aproximada de entre unha hora e cuarto e unha hora e media.
As rutas urbanas, que parten da Facultade de Historia e conclúen na de Física, propoñen un percorrido que conecta o casco vello de Santiago co Campus Sur, combinando espazos e tempos da ciencia. Ao longo do traxecto, abordarase a evolución das prácticas científicas e educativas desde o século XIX ata a era franquista, tocando temas como os gabinetes educativos, os laboratorios privados, a informática primitiva, ou o papel da ciencia na Guerra Civil.
Pola súa banda, os obradoiros históricos terán lugar na Facultade de Física da USC e apostan por unha reconstrución práctica da ciencia dos séculos XVIII e XIX. Nestes encontros, os asistentes poderán observar e comprender o funcionamento de instrumentos históricos a través de experimentos realizados con material moderno. Os temas tratarán desde o baleiro e os hemisferios de Magdeburgo, ata a polarización da luz, o coñecemento tácito ou as implicacións filosóficas do consenso científico.
O proxecto destaca pola súa vontade de reflexionar sobre a natureza híbrida da ciencia, entendida como unha interacción constante entre persoas e tecnoloxías. Así, Física Cíborg propón repensar a física non só como unha disciplina de conceptos abstractos, senón como unha práctica encarnada en corpos e máquinas, en contextos históricos concretos e con consecuencias sociais.
A iniciativa, que conta cunha activa presenza nas redes sociais e na web fisicaciborg.blogs.uv.es, está coordinada polos investigadores Anxo Vidal e Josep Simon, quen tamén poden ser contactados para concertar participacións nos itinerarios ou talleres.
As actividades forman parte dun esforzo máis amplo por poñer en valor o patrimonio material e inmaterial da ciencia galega e europea, implicando tanto a comunidade universitaria como ao público xeral na comprensión crítica do saber científico e a súa historia.
