A Consellería de Cultura, Lingua e Xuventude da Xunta de Galicia vén de anunciar un novo programa de visitas guiadas para achegar á cidadanía á arquitectura e ao funcionamento interno da Cidade da Cultura, en Santiago de Compostela. A iniciativa, titulada ‘Outra mirada’, ofrecerá percorridos temáticos e gratuítos por diferentes espazos do complexo do Gaiás, incluíndo tanto zonas accesibles habitualmente como outras restrinxidas ao público.
As visitas comezarán o sábado 26 de abril cun itinerario centrado no Museo Centro Gaiás, no que as persoas asistentes poderán coñecer de preto tanto o deseño arquitectónico do complexo —obra do estadounidense Peter Eisenman— como os mecanismos internos que permiten o funcionamento dun centro destinado a acoller exposicións, espectáculos e eventos culturais de gran formato.
O programa continuará durante o mes de maio, cun calendario de visitas que incluirá o Edificio Fontán —última infraestrutura incorporada ao complexo— e tamén o conxunto da Biblioteca e Arquivo de Galicia, onde se custodia unha parte fundamental do patrimonio cultural galego. Entre os fondos conservados nestas instalacións atópanse o legado de Isaac Díaz Pardo, gravados de Luis Seoane, a biblioteca de Basilio Losada, obras de Carlos Casares e unha ampla colección de cartografía histórica de Galicia.
Tamén se prevé unha ruta específica polos espazos verdes que rodean os edificios da Cidade da Cultura, poñendo o foco na súa integración coa contorna natural do Monte Gaiás. Outro dos percorridos máis singulares será o que permitirá visitar a galería subterránea de servizos, unha infraestrutura que conecta internamente todo o complexo baixo terra e pola que se transportan pezas artísticas, equipamentos técnicos e subministracións.
A programación, segundo informou a Xunta, busca ofrecer unha experiencia diferente ao público, afondando en espazos que habitualmente non están abertos á visita libre e favorecendo unha comprensión máis profunda da dimensión cultural e funcional da Cidade da Cultura.
As visitas son de balde e requiren inscrición previa a través da páxina web da Cidade da Cultura, onde tamén se poden consultar os horarios, datas e dispoñibilidade de prazas.
