O presidente da Deputación da Coruña, Valentín González Formoso, e o alcalde de Oroso e presidente da Asociación de Concellos Vía Verde Compostela-Tambre-Lengüelle, Álex Doval, asinaron un convenio polo que a institución provincial financiará novas melloras e actuacións de acondicionamento e posta en valor desta senda ciclista e peonil, a máis longa de Galicia e que discorre sobre antigas vías do ferrocarril.
Segundo informa a institución provincial, a achega do organismo permitirá sufragar o 85% do orzamento do proxecto, que ascende a 149.108 euros e inclúe varias accións para seguir pondo en valor a infraestrutura impulsada pola Deputación da Coruña, a Fundación de Ferrocarrís Españois e os municipios polos que discorre a vía: Cerceda, Tordoia, Ordes, Oroso e, proximamente, Santiago de Compostela.
Noutra orde de cousas, a Deputación da Coruña subvencionará cinco festivais de arte urbana na modalidade de pintura mural. En concreto, repartirá axudas ao Cromático Mural Fest (Cambre), Rexenera Fest (Carballo), Expresa Oleiros Urban Fest, Festival Viladomar (Rianxo) e DesOrdes Creativas (Ordes).
Noutra orde de cousas, o presidente da institución provincial e a presidenta da Unión de Cooperativas Galegas EspazoCoop, Ana Olveira, asinaron un convenio de colaboración co obxectivo de fomentar o traballo e función das cooperativas, ademais de promover a economía social.
