O Concello de Santiago deu luz verde ao proxecto de rehabilitación do Pazo de Raxoi, co obxectivo de mellorar a accesibilidade e fomentar as visitas turísticas de carácter histórico e artístico. O orzamento destinado a esta actuación é de 3.925.061,75 euros, financiado parcialmente con fondos Next Generation EU, cun prazo de execución de 12 meses.
Segundo explicou a portavoz do Goberno municipal, Míriam Louzao, este proxecto, elaborado pola UTE Redondo Valladares e Rodríguez SLP + Ezcurra e Ouzande Arquitectura SLP, pretende ‘mellorar as instalacións, facendo máis eficiente o consumo de enerxía, e acondicionar os espazos de traballo e para as visitas públicas’. Ademais, realizaranse melloras nas plantas segunda e terceira do edificio, así como na restauración da capela e dos seus elementos mobles.
Unha das principais actuacións será a instalación dun ascensor que conectará todas as plantas do edificio, desde o soto ata a terceira planta, así como a construción dunha rampla de acceso, co fin de mellorar a accesibilidade.
OBRAS NO RURAL
O Goberno local tamén adxudicou tres proxectos de mellora na zona rural, cun importe total de 576.814,93 euros, dentro do plan POS+ Adicional 2/2023. Entre eles, destaca a renovación do pavimento de San Martiño (Aríns), a creación dun parque infantil en Reibó (Laraño) e a ampliación da rede de saneamento na rúa do Coto dous Olmos (Bando).
As tres actuacións, adxudicadas a empresas galegas, teñen prazos de execución que varían entre 40 días e catro meses, dependendo do proxecto.
REMODELACIÓN DE VIRXE DA CERCA
Por outra banda, a portavoz Míriam Louzao referiuse á proposta de remodelación da contorna de Virxe da Cerca, cuxo concurso de ideas está en marcha. Louzao indicou que o proceso será aberto ao diálogo con entidades e persoas afectadas, aclarando que o obxectivo é ‘eliminar o tráfico de paso innecesario’ para mellorar a zona.
