A Xunta de Galicia solicitará ao Goberno central que inclúa na próxima lei de orzamentos xerais beneficios fiscais e desgravacións para as empresas que colaboren na organización do Xacobeo 2027. Así o anunciou a Xunta nun comunicado despois de que o presidente galego, Alfonso Rueda, recibise este luns en Pontevedra a insignia de ouro da Asociación de Amigos e Amigas do Camiño Portugués a Santiago.
Durante o acto, Rueda destacou o crecemento do Camiño Portugués e a súa variante pola costa, rutas que xa recibiron máis de 125.100 peregrinos no que vai de ano. O presidente galego subliñou a importancia de fomentar un turismo sostible, poñendo de relevo o traballo da Asociación e do albergue de Pontevedra como “un dos mellores escaparates turísticos da Comunidade”.
Rueda tamén mencionou que o Plan Director Camiño de Santiago 2022-2027, cun orzamento de 141 millóns de euros, busca mellorar a rede de albergues públicos, restaurar Bens de Interese Cultural e fomentar a dixitalización do sector turístico de cara ao próximo Ano Santo.
