Santiago inaugurou este xoves a súa nova plataforma loxística de distribución urbana de mercadorías, unha infraestrutura chamada a “revolucionar” a repartición da última milla na cidade. No acto participaron o delegado do Goberno en Galicia, Pedro Blanco; a alcaldesa de Santiago, Goretti Sanmartín; e o presidente de Mercasa, José Miñones. Durante a súa intervención, Pedro Branco lembrou que o proxecto contou cun investimento total de case 4,6 millóns de euros, dos que o Goberno central achegou 3,9 millóns a través do Plan de Recuperación.
MERCADORÍAS CONCENTRADAS NO TAMBRE E REPARTICIÓN ELÉCTRICA
A nova plataforma busca concentrar a recepción das mercadorías no polígono do Tambre para distribuílas posteriormente mediante vehículos eléctricos de pequeno tamaño. O obxectivo é reducir a entrada de tráfico pesado no centro histórico, diminuír o ruído e recortar as emisións contaminantes. Segundo destacou Goretti Sanmartín, a infraestrutura tamén pretende contribuír á conservación do patrimonio e mellorar a calidade de vida da cidadanía. A intención do Concello é que a plataforma entre en funcionamento antes de que remate o ano.
UN PROXECTO IMPULSADO DENDE 2017
A iniciativa busca facer máis flexible e eficiente o abastecemento dos establecementos comerciais e hostaleiros. O proxecto xa aparecía desde 2017 en diferentes documentos estratéxicos e recibiu un novo impulso en 2021 coa súa inclusión na programación plurianual presentada ao Real Padroado. A plataforma está situada nunha parcela de case 40.000 metros cadrados, ao norte do polígono do Tambre e á beira de Mercagalicia. A superficie construída alcanza os 2.335,66 metros cadrados e dispón dunha zona de carga e descarga e de catro áreas de aparcadoiro que ocupan 11.249 metros cadrados.
CAPACIDADE PARA 12 OPERACIÓNS SIMULTÁNEAS
A nave organízase arredor dunha zona principal, alta e diáfana, preparada para albergar as distintas fases do proceso loxístico. Os portos de acceso teñen capacidade para sete vehículos simultáneos, mentres que os de saída permiten realizar cinco cargas ao mesmo tempo. Esta configuración busca axilizar a recepción, clasificación e redistribución das mercadorías cara aos establecementos da cidade.
UN MODELO PIONEIRO EN ESPAÑA
Tanto Pedro Blanco como Goretti Sanmartín e José Miñones destacaron que Santiago se converte coa nova plataforma na primeira cidade en implantar este modelo de distribución urbana. A experiencia, segundo auguraron, poderá servir como referencia para outros centros históricos de España que afronten problemas similares de tráfico, contaminación e dificultades no reparto de mercadorías. A plataforma, denominada LóxiCo, é resultado da colaboración entre o Ministerio de Transportes, o Concello de Santiago, Mercasa, Mercagalicia e o Consorcio de Santiago. A execución material das obras correu a cargo da empresa pública Tragsa.
