A Universidade de Santiago de Compostela pechou o exercicio 2025 cun superávit orzamentario de 1,02 millóns de euros, segundo o informe de situación das contas presentado este martes no Consello de Goberno presidido polo reitor Antonio López. No que respecta aos resultados non financeiros, a cifra elévase ata os 3,71 millóns de euros, consolidando a estabilidade económica da institución compostelá.
Os datos máis salientables no capítulo de gastos vencéllanse ao persoal, onde destaca o incremento retributivo aprobado na normativa básica para o sector público. Este aumento de custos reflectiuse tanto no colectivo de PTXAS como no de PDI e no capítulo V. Paralelamente, a universidade realizou un importante esforzo na mellora de infraestruturas coa licitación de 62 expedientes de contratación ao longo do ano.
Pola banda dos ingresos, o Plan Galego de Financiamento Universitario supuxo unha achega de 15,65 millóns de euros máis que no exercicio de 2024. A USC tamén puxo en valor a súa elevada capacidade de captación de fondos para I+D+i, cunha tendencia ascendente nos últimos cinco anos. En 2025, os dereitos recoñecidos por actividades de investigación con financiamento externo acadaron os 96,85 millóns de euros.
O informe económico tamén pon o foco nas actividades de posgrao propio, que contaron con máis de 150 accións formativas e a matriculación de 2.258 estudantes. Estas ensinanzas xeraron uns ingresos estimados para a institución de 1,5 millóns de euros.
