A concelleira de Turismo de Santiago de Compostela, Míriam Louzao, valorou este xoves os datos recentes de tráfico aéreo no aeroporto compostelán e afirmou que o descenso no número de pasaxeiros responde á situación derivada das obras na infraestrutura, que condicionan a operatividade da terminal.
Durante unha rolda de prensa, Louzao lembrou que esta caída xa fora anticipada polo goberno municipal nos últimos meses e asegurou que o Concello continúa traballando para reforzar a conectividade aérea da cidade unha vez rematen os traballos previstos.
Segundo explicou, a previsión é que a partir da reapertura do aeroporto, prevista para maio, se produza unha recuperación das conexións e se incorporen novos destinos internacionais. Neste sentido, indicou que está previsto contar con 17 destinos internacionais e un incremento das rutas dispoñibles, o que permitiría ampliar a oferta de conexións desde Santiago.
A concelleira insistiu en que o Concello mantén contactos con distintas compañías aéreas co obxectivo de reforzar a presenza de rutas na terminal compostelá. “Estamos traballando e falando con compañías para que, cando abra de novo o aeroporto, haxa moitísima máis conectividade”, afirmou.
PETICIÓN DE COORDINACIÓN Á XUNTA DE GALICIA
Louzao tamén aproveitou a súa intervención para reclamar unha maior implicación da Xunta de Galicia na planificación e promoción das rutas aéreas, defendendo que a conectividade aeroportuaria é unha cuestión que afecta ao conxunto do territorio galego.
A responsable municipal de Turismo subliñou que a redución de conexións non repercute unicamente na cidade de Santiago, senón que ten consecuencias para o conxunto do país. “A falta de conectividade non afecta só ás compostelás e composteláns, senón que é unha cuestión de país”, sinalou.
Neste contexto, pediu á administración autonómica que asuma un papel de coordinación entre os aeroportos galegos e impulse a promoción das rutas aéreas, co obxectivo de mellorar a oferta de conexións internacionais.
“Entendemos que ese traballo debía de ser coordinado pola Xunta de Galicia”, indicou Louzao, quen reiterou a necesidade de que a administración autonómica se implique na planificación aeroportuaria e na promoción das rutas nos aeroportos galegos.
A XUNTA COLABORARÁ CON BOQUEIXÓN E O PINO
Ademais, o conselleiro de Presidencia, Xustiza e Deportes da Xunta de Galicia, Diego Calvo, visitou este venres as melloras realizadas no viario que conecta Louredo co aeroporto de Santiago de Compostela, unha actuación impulsada polos concellos de Boqueixón e O Pino co apoio da administración autonómica.
Segundo explicou a Xunta, os traballos centráronse no acondicionamento da vía, a drenaxe das augas pluviais e a mellora da accesibilidade, co obxectivo de facilitar as comunicacións cos núcleos rurais da contorna e reforzar os accesos cara á terminal aeroportuaria.
Durante a visita, Calvo lembrou que estas actuacións se enmarcan na Orde de infraestruturas de uso público, dotada con 3,5 millóns de euros e dirixida a concellos de menos de 30.000 habitantes. A través deste programa, a Xunta pode financiar até o 80% do custo das obras de creación ou mellora de infraestruturas municipais, priorizando ademais os proxectos presentados de maneira conxunta por varios municipios, como foi o caso de Boqueixón e O Pino.
