O ministro de Economía, Comercio e Empresa, Carlos Cuerpo, visitará a Universidade de Santiago de Compostela o vindeiro mércores, 4 de febreiro, para impartir unha charla dirixida ao alumnado da Facultade de Ciencias Económicas.
A sesión celebrarase a partir das 11:30, na Aula A, baixo o título ‘Aprendendo dás empresas e institucións’, e enmárcase na Aula Profesional Ecoade, unha iniciativa que cada curso promove actividades formativas complementarias para os estudantes dos títulos oficiais de grao e máster que se imparten no centro.
A presenza do ministro na facultade compostelá foi valorada positivamente desde o ámbito académico. O director do Foro Económico de Galicia e profesor da USC, Santiago Lago, amosouse “encantado” coa visita e subliñou o interese da actividade para a comunidade universitaria.
“Unha experiencia enriquecedora para os nosos estudantes e un recoñecemento ao traballo que se desenvolve no centro”, afirmou Lago a través das redes sociais, destacando a oportunidade de achegar ao alumnado a visión directa das empresas e das institucións desde a experiencia dun responsable político de primeiro nivel.
