A Mesa Xeral do Concello de Santiago, integrada polo goberno municipal e a representación sindical, deu luz verde na reunión celebrada hoxe á actualización do Acordo Regulador-Convenio Colectivo do persoal municipal. O obxectivo do acordo é adaptar o marco laboral ás necesidades actuais da administración local, á normativa vixente e á xurisprudencia aplicable.
O texto aprobado é froito dun traballo previo desenvolvido nunha comisión específica na que se analizou a situación do persoal de bombeiros e da Policía Local. A partir desa análise, as partes acadaron un compromiso para avanzar na elaboración dunha nova Relación de Postos de Traballo (RPT) e na actualización das gratificacións por servizos extraordinarios.
No relativo á RPT, o proceso iniciouse o pasado 15 de decembro e conta, na súa vertente metodolóxica, coa participación do grupo de investigación en Recursos Humanos e Rendemento da Universidade de Santiago de Compostela. Segundo o calendario previsto, os traballos concluirán no mes de xuño de 2026. Durante este período crearase un grupo de traballo no que estarán representadas as direccións de área, a coordinación xeral e as organizacións sindicais. Unha vez finalizada esta fase técnica, abrirase a negociación para culminar e aprobar a nova RPT, cuxa entrada en vigor terá efectos económicos desde o 1 de xaneiro de 2026, condicionados ás dispoñibilidades orzamentarias municipais.
O acordo alcanzado inclúe tamén a revisión das contías das gratificacións por servizos extraordinarios. Para un posto de nivel 18, que é o máis habitual na estrutura municipal, establécense importes que van desde os 23,73 euros por hora en xornada diúrna ata os 41,54 euros por hora nocturna en día festivo. Os incrementos entre as distintas franxas horarias fixáronse nun 25 % máis para as horas nocturnas, un 50 % para as horas diúrnas en festivo e un 75 % para as horas nocturnas en festivo.
Outra das novidades recollidas no pacto é a integración do plus de festividade no complemento específico, un concepto que ata o de agora se aboaba como gratificación por servizos extraordinarios. No caso dun posto C1 de nivel 18 con quendas cíclicas, esta modificación supón a incorporación fixa de 3.013,65 euros anuais ao complemento específico.
