A sede do GDR Terras de Compostela acolleu este mércores a presentación oficial do programa Comedores Responsables KM0, unha campaña pioneira en Galicia que pretende favorecer a incorporación de produtos de proximidade e de tempada nos comedores colectivos. A iniciativa está coordinada pola Asociación Terras de Compostela e conta con financiamento da Axencia Galega de Desenvolvemento Rural (Agader) a través dun convenio cos GDR. Desenvolverase ao longo dos anos 2025, 2026 e 2027.

No acto participaron representantes da Xunta de Galicia e do propio GDR, entre eles Paz Rodríguez Rivera, directora xeral da Axencia Galega de Desenvolvemento Rural; M. Guarina Rey Vázquez, presidenta do GDR Terras de Compostela; Chefa Fernández, xerente do GDR; Sagrario Pérez Castellanos, subdirectora xeral de Estilos de Vida Saudables da Consellería de Sanidade; e Francisca Gago Guillán, subdirectora de Relacións cos GDR.

O proxecto está aliñado coa estratexia europea Da Granxa á Mesa e co Real Decreto 315/2025, que obriga a partir de abril de 2026 a que os comedores escolares inclúan unha porcentaxe significativa de froitas e verduras frescas, locais e de tempada. Neste contexto, Comedores Responsables KM0 pretende acompañar escolas, residencias e outros centros na adaptación á nova normativa, ofrecendo información, formación e apoio na xestión.

A presidenta do GDR Terras de Compostela destacou que o programa é “unha oportunidade para dinamizar o noso medio rural, reforzando o papel dos produtores locais, pequenos transformadores e empresas agroalimentarias, ao tempo que se promove unha alimentación máis saudable para a cidadanía”.

A campaña estrutúrase en tres piares: priorizar o consumo local fronte ao global, apoiar o desenvolvemento económico e social do rural galego e fomentar un modelo de consumo sostible que contribúa a unha sociedade máis sa.

Os GDR salientaron tamén o carácter colectivo da proposta, baseada en sinerxías entre administracións, centros educativos, produtores e familias, co obxectivo de avanzar cara a un modelo alimentario máis equilibrado. Ademais, en outubro celebraranse presentacións en cada un dos Grupos de Desenvolvemento Rural de Galicia para dar a coñecer os detalles a todos os colectivos implicados.