O Concello de Santiago de Compostela mantivo este martes unha reunión con representantes de Unión Hoteleira Compostela para abordar cuestións técnicas arredor da aplicación da taxa turística, que entrará en vigor o próximo 1 de outubro.
No encontro participaron a concelleira de Turismo, Míriam Louzao, e o edil de Facenda, Manuel César, ademais doutros responsables municipais. Segundo informou o consistorio, tratouse dunha sesión “cordial e produtiva” que dá continuidade ás mantidas nos últimos meses con diferentes asociacións do sector. O goberno local reiterou a súa intención de aplicar o imposto na data prevista, a pesar do recurso contencioso interposto por Unión Hoteleira.
A entidade recorrente considera que a proposta municipal non acredita a “necesidade concreta” esixida pola normativa autonómica e critica que se empreguen “datos dispersos” —como o tránsito de visitantes, o número de peregrinos ou os pasaxeiros— para xustificar a recadación. Ademais, sostén que non existe un déficit fiscal derivado do turismo que avale o novo gravame. Estas conclusións son rexeitadas polo executivo municipal, que defende a legalidade e xustificación da medida.
Consultados tras a reunión, desde Unión Hoteleira Compostela precisaron que a convocatoria tiña carácter “técnico” e centrouse en aclarar aspectos prácticos para a aplicación da taxa: “foron cuestións técnicas para aplicala”, resumiron.
A entrada en vigor da taxa turística en Compostela chega, así, precedida dun proceso de diálogo co sector, aínda que non exento de discrepancias xurídicas e interpretativas.
