A alcaldesa de Santiago, Goretti Sanmartín, participou este luns na inauguración das novas oficinas da empresa Cociñas Santos, situadas nun barrio en expansión da cidade, e aproveitou o acto para reivindicar o valor simbólico e social das cociñas como espazos centrais da vida cotiá. A rexedora felicitou á empresa polo seu percorrido de máis dun século e salientou que “o que Santos ofrece non é só un produto, senón un espazo para contar historias, que é a maneira de ter memoria e de seguir sendo”.
No seu discurso, Sanmartín fixo un percorrido pola evolución das cociñas galegas ao longo dos últimos cen anos, desde as lareiras nas casas rurais ata os actuais espazos de deseño, adaptados aos novos modelos familiares e formas de vida urbana. Lembrou que “as primeiras cociñas eran sinxelas, centradas no lume aberto, con poucos mobles e moita vida ao redor”, e comparounas coas actuais propostas de Santos, que considerou “espazos cómodos, innovadores e atractivos, pensados para compartir tempo de calidade”.
A alcaldesa quixo tamén vincular esta inauguración co proceso de transformación urbana de Santiago, ao subliñar que o novo edificio se sitúa nun barrio onde se están a construír “as primeiras vivendas públicas en décadas”, o que, segundo ela, abre unha nova etapa na que “as administracións están comprometidas para garantir condicións de vida dignas”. Neste sentido, apuntou que o Concello traballa en liña coas demais administracións para impulsar a rehabilitación, o uso de vivendas baleiras e a promoción pública, con proxectos como o da parcela de Peleteiro, en colaboración co Estado e o Sareb.
Durante a súa intervención, Sanmartín tamén fixo referencia ao crecemento demográfico da cidade, anunciando que Santiago superou xa os 100.000 habitantes, unha cifra que, segundo dixo, debe ir acompañada dun incremento na calidade dos servizos e da vivenda. “Non queremos só máis xente, queremos boas condicións de vida e espazos de calidade”, afirmou.
Por último, a alcaldesa felicitou ao equipo de Santos e ás familias que conforman a empresa por manter viva unha tradición iniciada hai un século por unha familia carpinteira, e por ter sido quen de “adaptarse aos cambios tecnolóxicos, organizativos e sociais sen perder a identidade”. “Santos soubo pasar do banco de carpintería á mecanización robótica, sen esquecer que nas cociñas é onde se contan as mellores historias”, concluíu.
