O pleno extraordinario do Concello de Santiago, celebrado este venres, deu luz verde á implantación da taxa turística, convertendo a capital galega na primeira cidade de Galicia en aprobar este imposto dirixido ás persoas que se aloxen en establecementos turísticos. A proposta saíu adiante con votos favorables do BNG, Compostela Aberta, o PSdeG e os catro edís non adscritos, mentres que o PP expresou reservas sobre a tramitación, o diálogo co sector e a capacidade técnica do Concello para a súa aplicación.
A sesión tamén serviu para facer efectivo o pase ao grupo de non adscritos de Mercedes Rosón, Gonzalo Muíños, Mila Castro e Marta Álvarez, ata agora pertencentes ao PSdeG. Mercedes Rosón, en nome dos catro concelleiros agora non adscritos, destacou que a medida permitirá distribuír os custos que o turismo xera na cidade: “Aprobar esta taxa é poñer orde na contribución de quen nos visita e aliviar parte da carga que até agora asumía exclusivamente a veciñanza”.
Desde Compostela Aberta, María Rozas salientou o “amplo consenso” que sustenta a iniciativa e defendeu a súa necesidade ante o “impacto dun modelo turístico insostible”, aludindo a problemas de acceso á vivenda e convivencia cidadá. Pola súa banda, o concelleiro socialista Gumersindo Guinarte apoiou a creación da taxa, pero advertiu de que “faltou diálogo directo co sector” e cuestionou a falta de medios e planificación: “A día de hoxe, a xestión deste imposto é unha quimera, segundo os propios informes técnicos do Concello”.
A postura máis crítica chegou do Partido Popular, cuxo portavoz Borja Verea cualificou a aprobación como “precipitada e pouco transparente” e preguntou directamente á alcaldesa se coñecía o informe de Tesourería que advertía sobre a falta de recursos humanos e técnicos para asumir a recadación da taxa. “Queremos saber en que se van investir os fondos, se houbo negociación real co sector e se o Concello está preparado para aplicala”, dixo.
Para pechar o debate, a alcaldesa Goretti Sanmartín defendeu a medida como un “paso necesario para avanzar nun modelo turístico máis sostible e consciente”. Subliñou que os fondos recadados se destinarán, segundo recolle a lei, a programas de protección do patrimonio, promoción turística sostible e mellora dos servizos. Tamén asegurou que “houbo múltiples encontros co sector” e que se traballa en ferramentas tecnolóxicas para facilitar as autoliquidacións.
A aprobación inicial da taxa abre agora un período de exposición pública antes da súa entrada en vigor, que segundo estimacións municipais podería producirse a finais de ano. A previsión de recadación anual sitúase entre 1 e 2 millóns de euros, que pasarán a engrosar os ingresos do Concello en 2025.
