O número de estadías nos establecementos hoteleiros de Santiago de Compostela acadou as 61.996 pernoctacións no pasado mes de xaneiro, segundo os datos publicados polo Instituto Nacional de Estatística (INE). Esta cifra supón un incremento do 9,72% respecto ao mesmo mes do ano pasado, reflectindo un avance cara á desestacionalización da demanda turística na cidade.
Trátase do segundo mellor rexistro na serie histórica do INE, que comezou en 2005. O récord segue a pertencer a xaneiro de 2020, cando se contabilizaron 62.288 estadías, apenas 300 máis que neste comezo de 2025. En ningún outro mes de xaneiro dos últimos vinte anos se superaron as 60.000 estadías, nin sequera durante os Anos Santos de 2010 e 2022, nos que se rexistraron 51.749 e 42.023 estadías, respectivamente.
Este aumento prodúcese despois dun 2024 no que a cidade alcanzou o seu máximo histórico de estadías anuais, chegando a 1.600.000 pernoctacións. Por primeira vez, a demanda internacional superou a doméstica, un indicador de que a cidade segue a internacionalizar a súa oferta turística.
O modelo turístico compostelán non só está a ampliar a súa tempada alta, senón que tamén está a xerar maior valor engadido. En xaneiro, a tarifa media nos establecementos hoteleiros situouse en 61,15 euros, o que representa un incremento do 8,61% respecto a xaneiro de 2024. Estes datos suxiren que Santiago continúa a consolidar un modelo turístico máis diversificado e sostible ao longo do ano.
