A Alameda de Santiago de Compostela acolle desde este venres e ata o domingo o último dos Mercados Alimentarios de Nadal organizados pola Xunta, unha iniciativa para promover os produtos galegos e visibilizar o traballo dos produtores locais. A conselleira do Medio Rural, María José Gómez, visitou o evento destacando a calidade e diversidade dos produtos galegos, así como a importancia de iniciativas como esta para fortalecer o sector agroalimentario.
A conselleira subliñou o “bo facer” dos produtores galegos e a excelente acollida que tiveron as anteriores edicións do mercado celebradas en Vigo, Ribadavia e Lugo. O mercado de Santiago, o último deste ciclo, reúne preto de 40 empresas que ofrecen unha ampla variedade de produtos de proximidade.
“Estes mercados permiten achegar os produtos da terra ás familias galegas, especialmente nunha época tan significativa como o Nadal”, indicou Gómez.
O mercado tamén conta cunha programación complementaria para todos os públicos. O sábado, ademais de poder adquirir produtos, haberá talleres infantís, un de elaboración de amuletos con faragulla de pan e outro de xeados con queixo artesán.
Os visitantes tamén poderán participar en catas de viños tintos con Denominación de Orixe, degustar doces artesanais e participar en sorteos de lotes de produtos.
O domingo, ademais de continuar os talleres e as degustacións, o mercado ofrecerá un monólogo a cargo de Leti da Taberna e espectáculos de teatro. O evento rematará cun sorteo de produtos agroalimentarios.
A conselleira animou a toda a cidadanía a achegarse á Alameda compostelá para gozar deste evento, que combina gastronomía, cultura e promoción da economía local nunha cita que pon en valor a riqueza do agro galego.
