A patinadora Aroha Traba Castiñeiras, do CPA Omega e orixinaria de Ames, proclamouse subcampioa galega na categoría Alevín feminino durante o Campionato Galego de Patinaxe Benjamín a Infantil, celebrado en Ribeira os pasados días 21 e 22 de setembro. Este importante logro permitiralle competir no Campionato de España, que terá lugar en Pamplona do 23 ao 26 de outubro.
Aroha Traba, que se atopa no seu segundo ano de competición, segue destacando no ámbito deportivo. No pasado, xa se converteu en campioa provincial da Coruña 2024, un título que tamén acadou o ano anterior, ademais de ser campioa galega na categoría benxamín.
A adestradora do CPA Omega, Anahí Sotelo, expresou a súa satisfacción co resultado, destacando que “Aroha é unha patinadora nova, de primeiro ano na categoría alevín, polo que é unha sorpresa agradable que acadase este título competindo contra patinadoras maiores”. Sotelo engadiu que “é unha deportista moi traballadora, constante e regular nos adestramentos”.
Ademais de Aroha Traba, o CPA Omega participou no campionato con Claudia Veiga, que acadou o sexto posto na categoría alevín feminino, e Adela Tarrío, que obtivo o quinto posto en benxamín feminino.
