O goberno municipal de Santiago realizou este mércores unha visita ao Complexo Deportivo de Santa Isabel para comprobar o avance da intervención integral que se está a desenvolver neste espazo. A alcaldesa, Goretti Sanmartín, afirmou que os traballos “van a moi bo ritmo e cumprindo prazos”, e subliñou que a actuación responde á aposta do executivo pola renovación dos equipamentos deportivos existentes, sen renunciar á creación de novos espazos.
Sanmartín agradeceu a comprensión dos clubes e usuarios durante o tempo que duren as obras, especialmente no caso da piscina, onde se retrasou un mes o inicio da intervención para non coincidir co calendario competitivo. O Concello buscou alternativas en colaboración con outros municipios para minimizar as molestias derivadas do peche.
Xunto a esta actuación, o goberno local lembrou que ao longo do verán tamén se acometeron melloras noutras instalacións. Entre elas, a accesibilidade e a cuberta do pavillón do CEIP Quiroga Palacios, así como a renovación da pista do CEIP Lamas de Abade, que presentara problemas de humidade o pasado inverno. Ademais, está previsto intervir nas cubertas dos campos de fútbol de Conxo e Fátima nas próximas semanas.
En canto ao prazo de execución das obras de Santa Isabel, está fixado en oito meses, co obxectivo de rematar no primeiro trimestre de 2026. A cuberta da piscina xa está practicamente finalizada e a do pavillón comezará a executarse nos vindeiros días.
Preguntada sobre outros proxectos, a rexedora explicou que o Complexo Deportivo de Santa Marta, comprometido para este mandato, se atopa actualmente en proceso de licitación. O Concello decidiu unificar a xestión de Sar, Santa Isabel e Santa Marta, tras unha revisión técnica da documentación.
Segundo Sanmartín, o pavillón de Santa Isabel, que acolle con frecuencia campionatos nacionais e internacionais, seguirá mantendo o seu alto nivel de uso, dado que a súa ocupación xa é do 100%, igual que acontece co resto dos pavillóns da cidade.
