A Praza do Obradoiro acolleu este sábado unha nova xornada do Circuíto 3×3 CaixaBank, o maior torneo estatal de baloncesto urbano gratuíto, coa participación de máis de 350 persoas e 89 equipos chegados de diferentes puntos de Galicia. A cita, organizada coa colaboración da Federación Galega de Baloncesto e patrocinada por CaixaBank, encheu o centro histórico de Santiago dunha intensa actividade deportiva, con xogos, adestramentos e concursos para todas as idades.
A alcaldesa Goretti Sanmartín participou no acto institucional da xornada, no que destacou o valor deste tipo de iniciativas como espazos para traballar a igualdade, a diversidade e a inclusión a través do deporte. Na súa intervención, agradeceu o compromiso das entidades organizadoras e animouse incluso a facer un lanzamento ao aro.
Ver esta publicación en Instagram
Acompañándoa estiveron tamén a concelleira de Deportes, Pilar Lueiro, o presidente da Federación Galega de Baloncesto, Julio Bernárdez, e representantes da entidade bancaria, como Susana Fernández, directora xeral, e María Jesús García Piñeiro, directora de Institucións en Galicia.
Baixo o lema “Cancha para todxs”, o circuíto promove unha práctica deportiva sen barreiras de idade, xénero ou condición física. O programa incluíu actividades específicas para persoas maiores, xogos para crianzas e espazos de lecer para a mocidade, convertendo o Obradoiro nun escenario de convivencia e celebración en torno ao baloncesto.
Un dos momentos máis esperados foi a campaña #TriplaSolidaria, na que cada triplo anotado polos asistentes contribuíu a alcanzar o obxectivo de 1.000 canastras por cidade, que se transformarán nunha doazón económica da Fundación “la Caixa”. Neste caso, os fondos recadados destinaranse á Fundación Andrea, que traballa co apoio a nenos e nenas con enfermidades de longa duración.
A xornada contou ademais coa presenza do xogador profesional Javier Beirán, que participa como embaixador do circuíto, ofrecendo exhibicións e animando á participación cidadá. Dende a organización destacouse a simboloxía de levar o baloncesto ao corazón de Santiago, nun lugar tan emblemático como a Praza do Obradoiro, e animouse a continuar promovendo eventos que combinen deporte, valores e compromiso social.
